27/02/12

Os transxénicos






Con estas impactantes imaxes, Greenpeace quere transmitir a súa preocupación polos alimentos transxénicos. Como vedes, as fotos son de vexetais adoptando a forma de animais: son os animais dos que se extraen os xens que levan mesturados.

Estes son algúns dos datos que dá Greenpeace para alertar contra o consumo de alimentos modificados xeneticamente (OMG):

- Só dez multinacionais controlan case o 70% do mercado mundial de sementes, o que significa que os e  as agricultoras teñen pouca capacidade de elección.

- Os cultivos transxénicos non alimentan ó mundo. O 99,5% de agricultores e agricultoras non os cultivan.

- A agricultura industrial usa fertilizantes sintéticos e agroquímicos que contaminan os nosos solos e augas, recursos necesarios para producir alimentos sans agora e no futuro.

- O excesivo uso de fertilizantes de síntese na agricultura industrial contribúe ó agravamento do cambio climático.

- Trátase dunha tecnoloxía cun nivel de imprecisión moi elevado, cuxos efectos impredecibles tanto a curto como a longo prazo xa están a ser documentados pola ciencia independente.

- Os transxénicos son un grave risco para a biodiversidade e teñen efectos irreversibles e imprevisibles sobre os ecosistemas. Supoñen incremento do uso de tóxicos, contaminación xenética e do solo, perda de biodiversidade, desenvolvemento de resistencias en insectos e vexetación adventicia ("malas herbas") e efectos non desexados noutros organismos.

- Supoñen un risco para a saúde: potencialmente poden supoñer novas alerxias, aparición de novos tóxicos, diminución na capacidade de fertilidade (en mamiferos alimentados con OMG), contaminación de alimentos, problemas en órganos internos, etc.

- Greenpeace oponse a toda liberación de OMG ó medio ambiente (liberación de animais ou plantas). Os ensaios en campo ou cultivos experimentais, incluso a pequena escala, presentan igualmente riscos de contaminación xenética, polo que tamén deben prohibirse.




Por outra banda, estas serían as supostas ventaxas dos transxénicos segundo atopamos noutras webs:

- Poderemos consumir alimentos con máis vitaminas, minerais e proteínas, e menores contidos en graxas.

- Produción de ácidos graxos específicos para uso alimenticio ou industrial.

- Cultivos máis resistentes ós ataques de virus, fungos ou insectos sen a necesidade de empregar produtos químicos, o que supón un aforro económico e menor dano ó medio ambiente.

- Cultivos resistentes ós herbicidas, de xeito que se poidan manter os rendimentos reducindo o número e a cantidade de produtos empregados e usando aqueles con características ambientaies máis desexables.

- Maior tempo de conservación de froitas e verduras.

- Aumento da produción.

- Diminución dos costes da agricultura.

- A biotecnoloxía pode axudar a preservar a biodiversidade natural.

- Cultivos tolerantes á sequía e estrés (por exemplo, un contido excesivo de sal no solo).


Para ler máis sobre o tema: os transxénicos na Wikipedia.

Se queredes saber que alimentos son transxénicos, Greenpeace ten editada esta guía.

2 comentarios:

Anónimo dixo...

Por favor que un profesor de galego revise todalas faltas de ortografía que hai escritas en galego, por exemplo:
semillas en galego é sementes e desarrollar en castelán é, en galego, desenvolver.

osquelemos dixo...

Grazas, anónimo! Erros corrixidos e solicitude pasada ó departamento de galego.